Кондак 9
Все естество ангельское похвальная песни приносит Тебе, истинней Матери Божией и Заступнице всех приходящих к Тебе и просящих Твоея помощи, яко твердым и крепким Твоим предстательством праведных веселиши, грешных заступаеши, печали утоляеши, сродником нашим почившим загробную участь облегчаеши, и молишися о всех нас, верою зовущих Сыну Твоему: Аллилуиа.
Икос 9
Человечестии ветии суемудрении недоумевают познати Божественную тайну Твоего Приснодевства, Богородице, ниже могут изъяснити силу чудотворную от икон Святых Твоих проистекающую, во исцеление недужных и на всякую пользу душевную и телесную человеком. Мы же благочестно, Матерь и Деву, Тя исповедающе, достойно хвалим славный, Владычице, иконы Твоея праздник, верно поклоняемся образу Твоему Святому и с любовию вопием:
Радуйся, Богоневесто, Свет рождшая Божественный и Превечный;
Радуйся, Мати и Дево Преблагословенная;
Радуйся, матерей присное радование;
Радуйся, Едина Непорочная и Добрая в женах;
Радуйся, Ангелов Славо, Столп утверждения и Сокровище спасения;
Радуйся, Царице Небесная, источник нетления и дверь покаяния;
Радуйся, благосердая Мати всех скорбящих и обременных;
Радуйся, Державная Заступнице рода христианского.
Радуйся, Пренепорочная Богородице Дево Призри на смирение, с высоты небесной на смирение рабов Твоих призирающая.
Кондак 10
Спасителя падшему человечеству родила еси, Всенепорочная Дево, и Сего, яко Младенца во объятиях Твоих носила еси. Егоже Божественное изображение и на честней иконе Твоей нам являеши и многая милости и щедроты Твоя нам даруеши. Сего ради с верою и любовию чествуем образ Чудотворный Твой, Владычице, и молимся Тебе прилежно: буди покров и защита нам в день Судный, да Твоим Матерним предстательством помилует нас Судия праведный, Сын Твой, и сподобит деснаго стояния и пения Ему со всеми изобранными: Аллилуиа.
Икос 10
Стена и покров еси граду Пскову дадеся Святая икона Твоя, Царице и Владычице, многажды град сей от разорения ратного сохранила еси. И ныне нас грешных и недостойных чад Твоих милостивно посетила еси чудным явлением Пречистаго Твоего образа и благоутробно приемлеши пред Ним возносимыя Тебе от благодарных сердец наших молитвы с пением таковым:
Радуйся, якоже древле иконою Успения славный град Киев многократно спасала еси, тако и ныне нас пречудною иконою Твоею от бед ограждаеши;
Радуйся, Лавры Киево-Печерския славная строительнице и храмов ея всечестная украсительнице;
Радуйся, Хранительнице Дивная и иных обителей святых, яко Твоею благодатною силою оныя зиждятся и преуспевают в благочестии;
Радуйся, прославившая место явления иконы Твоея дивным чудодействием и всем милость преизобильную нам показавшая;
Радуйся, Богоневесто Пречистая, святый лик Твой чтущих от осуждения и мук многообразных избавляющая;
Радуйся, Многомилостивая Покровительнице наша, от пречудныя иконы Твоея милости нам неоскудно источающая;
Радуйся, Владычице, матерними молитвами Твоими души наша от мрачного сна восставляющая к Твоему славословию;
Радуйся, Радосте миру, яко о Тебе радуется ангельский собор и человеческий род.
Радуйся, Пренепорочная Богородице Дево Призри на смирение, с высоты небесной на смирение рабов Твоих призирающая.
Кондак 11
Пение молебное наше с верою и любовию возносимое, милостивно услыши, Госпоже Владычице, и утробу щедрод Твоих не затвори нам, Всещедрая Богородице: се бо обнищавше в добрых делах, к сокровищнице милости Твоея, - чудней иконе Твоей, - со усердием притекаем, Всеблагая, и припадающе к Ней, молимся: сохрани ны от тлетворных учений, избави от лукавых совращений, спаси Отечество наше от нестроений и злых нападений вражиих, и сподоби в любви и единомыслии со всеми верными чадами Святые Христовы Церкви, благоприятно пети Создателю нашему песнь: Аллилуиа.
Икос 11
Светлыми лучами чудес немерцаемо сияет Святая икона Твоя, Всенепорочная Богородице Дево, просвещаеши бо нас, помраченных греховною мглой и приводиши к немолчному славословию Твоего Пресятого Имене. Тем же радуемся, мы грешнии, имуще таковый залог Твоего к нам благоволения, и Тебе, скорой Помощнице нашей, благодарственно взываем:
Радуйся, Царице и Владычице, светом Твоим небесным нас освящающая и под кровом Твоим выну сохраняющая;
Радуйся, Благословенная и Препрославленная, Мати Неискусомужная, умервщленныя грехами души наша оживотворяющая;
Радуйся, Чистая и Непорочная Дево, Ты бо родила еси Сына, избавляющего нас от искушений;
Радуйся, Всеславная Владычице Богородице, от всяких ны зол и скорбей исхищающая и нозе наша на камене божественнаго спасения поставляющая;
Радуйся, Чистая Агница, Дево, Мати, Отроковище, чисты ны сотворяющая от страстей телесных;
Радуйся, яко да льстиваго избавляются сетей, вси неснословящия Тя, Богорадованная;
Радуйся, Гора Велия, Юже Даниил провиде, из Нея же Честный Камень, - Христос, - плотию облечеся;
Радуйся, Дево Чистая, Жезл из корене Иеисеева, цветовозрастиши нам всесильнаго Господа;
Радуйся, Пренепорочная Богородице Дево Призри на смирение, с высоты небесной на смирение рабов Твоих призирающая.
Кондак 12
Благодати Божия Святое и Непорочное жилище, Мати Господа Вышних сил, не возгнушайся нас грешных и недостойных, воспевающих милости от всячестныя иконы Твоея нам явленныя, и Твоим невечерним сиянием озари наша темныя души, приводящи к Свету Трисолнечнаго Божества; в Православии укрепи нас, Всеблагая, и сподоби до конечнаго воздыхания нашего пети немолчную песнь Вседержителю: Аллилуиа.
Икос 12
Поюще песнь хвалы и благодарения Тебе, Богорадованная Дево, проповедуем велегласно величие чудес Твоих и богатство милости Твоея, на нас и Отечестве нашем явленных,
и от глубины сердечныя приносим Тебе со смирением похвальныя дары сия:
Радуйся, Православия Несокрушимая Крепосте и Оградо;
Радуйся, Непобедимая Воеводо вождей и воинств христианских;
Радуйся, Неложное Спасение и Предстательнице мира, рождшая Зиждителя, Имже от напастей и болезней спасеся мир;
Радуйся, Мысленныя Двери Жизни, покаяния нам двери отверзающая;
Радуйся, Едина Благословенная, в час смерти темныя зраки лукавых бесов далече от нас прогоняющая;
Радуйся, Едина Милосердная, в страшный день Суда, вечныя муки нас избавляющая и неизреченныя славы Сына Твоего наследники ны показующая;
Радуйся, Всенепорочная, выну человеколюбия Твое являющая и от соблазнов и сетей вражних нас свобождающая;
Радуйся, Пречистая, Сотворившая с нами знамение во благо: да видят ненавидящий нас и постыдятся, яко Ты вняла еси прошения нашим и утешила ны.
Радуйся, Пренепорочная Богородице Дево Призри на смирение, с высоты небесной на смирение рабов Твоих призирающая.
Кондак 13
О, Всепетая Мати Господа нашего Иисуса Христа, неисчерпаемое море Божественных даров, Ты еси, Всесвятая Дево! Яко светоподательную лампаду, елеем милости исполненную, созерцаем Тя очами веры и кротким сиянием Твоим озаряемы, любовию же Твоею присно согреваемии, Тебе, яко благой Заступнице нашей, со умилением глаголем: приими благоутробно молебное пение наше, пред Чудною иконою Твоею с верой Тебе возносимое, и всесильными молитвами Твоими умоли, Владычице, избавитися нам грешным временных бед и вечныя муки, да спасеннии Тобою прославим и в будущей жизни Всесятое имя Сына Твоего и Бога нашего, верно зовуще Ему: Аллилуиа.
(Этот кондак читается трижды, затем искос 1 и кондак 1)